Tura, July 19: Tura-ni SMELC-o ong•atenggipa Jackfruit Mela 2022-ko Mongolbar salo, Meghalaya a•dokni Chief Minister Conrad K Sangma, a•bachengate on•angaha.
Jackfruit Mission-ko a•dok sorkari, 2018 bilsini July jao a•bachengatahachim aro ia mission ba kamko Food Processing Directorate, jako ra•e ka•engachim.
Garo Hills-o te•brongko man•ramramaiani gimin te•brongoniko ma•manti cha•ani bosturangko tarie manderangna janggi tangani cholrangko on•na man•na gita sorkari, ia Jackfruit Mission-ko a•bachengatahachim.
Ia Jackfruit Mela-ko a•bachengate on•angani somoio a•dokni Chief Minister, jinmana aganprakangengon, Garo Hills-ara ding•gipa biap ong•ani gimin te•brong ge•na gita namgipa biap ong•a aro te•brong ge•anichi gong kror 400-mangko man•engani gimin te•brongko name ge•genchimode ian manderangni janggi tangani gadangko ra•dona dakchakani ong•gen ine parakangaha.
Te•brongko a•gilsakni gipin biaprango manderang namniktokbea ine janapatengon, sorkarini ra•gatgipa program-ni dakchakaniko aro department-ni pilak dakchakanirangko ra•e Garo Hills-o game ge•e cha•enggipa manderang, an•tangtangni bading chiwalanirangko tang•doatna cholko ra•na nanga ine Chief Minister aganangaha.
Batanggimin bilsibrini gisepo ia sorkari, game ge•e cha•enggipa manderangni namgnina dingtang dingtang program-rangko a•bachengate on•aha ine janapatengon, a•dok sorkarini Jackfruit Mission-ko a•bachengatanichi manderang, te•brongoniko ma•manti bosturangko tarie an•tangtangna man•dapanirangko ra•bana man•aha ine Chief Minister parakataha.
A•dok sorkarini a•bachengatgipa FOCUS program-ni gimin aganangengon, ia program-chi lak 4.5 game ge•e cha•giparang namgnirangko man•gen aro lak 2.5-mangni gitade ia scheme-ni ning•o tangka paisani gita dakchakanirangko ra•manaha ine Chief Minister parakataha.
Ia Jackfruit Mela-ko ong•atanio a•dokni Chief Minister, Special Assistance to Tribal-Sub-Scheme-ni ning•o bol 5-na baten power tiller-rangkoba game ge•e cha•giparangna pakwate on•angan baksana Garo Hills-na power tiller-rangko suale on•ani scheme-koba a•bachengate on•angjolaha.
