Shillong, Dec 23: Vadodara-o Under-16 Vijay Merchant Trophy-na Meghalaya aro Hyderabad dolrangni gisepo cricket kal•susaani a•bachengachibara Meghalaya dol name dakna man•ahaoba, Sukrobar salo innings ge•sa aro 56 run-rangchi Hyderabad dolni jako amako man•rikaha.

Gnigipa innings-o wicket sak 6-ko gimaate 139 run-oni dokangkuengon, Meghalaya dolni kal•giparang 22 run-rangkosan dokdapna man•aiaha aro uandaken gimik 161 run-rangko man•e wicket gimkan sigopaha.

Meghalaya dolni Justin Fancon, Sukrobar pringo dokpiltaie 7 run-rangkosan dokna man•dapaiaha aro 11 run-mangmangko man•e siangaha. Meghalaya dolni sakgipin Gaurav Jyoti, 15 run-rangko dokangskaaha.

Ia kal•anian Meghalaya dolni ia tournament-o bon•kamgipa kal•aniba ong•ahachim indiba ia kal•anio Meghalaya dolni Rudra Singh Rathore, nambee kal•angenba 54 run-rangko man•e on•aha aro Meghalaya dolni sakgipin Da U La Biang Shangpliang-ba nambee ball-ko goanichi 91 run-rangko on•e sakbonga wicket-rangko ra•skaaha.

Meghalaya dolni sakgipin Trinayan Dutta-ba Bristibar salo 36 run-rangko dokangaha.