Shillong, Dec 23: United Democratic Party (UDP) dolni chief youth organiser Eugeneson Lyngdoh, a·doko dingtang dingtang ong·enggipa obostarang baksana chadamberangni kam gri ong·ani aro pekatgipa bosturangko jakkalanichi songsalna namgijaniko ong·atani mamlarangko youth wing dingtangmancha jako ra·e kamko ka·anggen ine Sukrobar salo aganangaha.
Youth-ni dilgipa Lyngdoh baksana youth wing-ni adita sak memborrang, sobaenggipa Krismasna uamangni namgipa sikanirangko sakantinan on·angenba, UDP-ni chadambe dolni kam ka·na mangsonganirangko uamang Sukrobar salo kobor ra·timgiparangna aganangaha.
Pekatgipa bosturangko jakkalanichi bang·a nokdangrang rusiatako man·engani gimin, chadamberangni gisepo pekatgipa ringanirangko jakkalgipa bang·engani bidingoba youth wing gisik on·bate kamko ka·na nangnikenga ine janapatan baksa, pekatgipa bosturangko jakkalanirang songadam biap gimikchin ong·enga ineba ua janapatjolaha.
“Shillong-ko, salgro-salaram jolni chatrorangna skie ra·na gita nambatgipa biap ong·a ine bang·aan ma·sitokachim, ua bimingko man·taipilna gita chinga nangnikenga, maina da·ororo competitive exam-rango chu·sokanggipa chadamberang namen komienga, uni gimin iandakgipa porikkarangko sena gita chadamberangko changsatai didina gita chinga chol-ramarangko sandie kamko ka·gen,” ineba Lyngdoh janapataha.
Iarangna agreba, tourism-ni a·bao chadamberangko bak man·ate uamangna kamrangko ka·e cha·na cholrangko on·na gita youth wing, Tourism-oba gisik on·e kamko ka·anggen ineba aganangkuaha.
“UDP dolna chakpaaniko on·china aro bakrimanirangko on·china gita pilak chadamberangko mol·molatan baksa, a·dokoni pilak chadamberangni chagrongenggipa neng·nikanirangko namatna sakantini agan-ku·pattianirangkoba chadambe dol ong·e uamang ra·chakna kusi ong·a ineba Lyngdoh, parakataha.
