Shillong, March 26: Meghalaya a•doko bijolini gita neng•nikanirangko man•na nangengani gimin aro MeECL-o ong•enggipa obostarangna Power Minister-ko matnange kamoniko ra•galchina gita United Democratic Party (UDP) dabiengon, UDP dolni nangnikaniko ua ma•sichakenga indiba uamang ong•gija mandekosa matnangskaenga ine Meghalaya a•dokni Power Minister James K Sangma parakataha.
Sangma-ni parakatani gitade, UDP dolni nangnikaniara namgipa kaman ong•engachim indiba da•o ong•enggipa sorkariko matnangani palde MeECL-o ia obostako ra•bagipa dolrangkosa matnangani ong•engachim.
“Uamangni nangnikaniko anga an•tangde namnikaia indiba uamang ong•gija manderangkosa matnangenga. Bijolini grorang indita bilsirangni ja•man da•o namen tang•doaha aro ia grorangko bilsigni ba bilsigittamni gisepode darangba matchotatna man•jawa, uni gimin uamang name nipilchenge matnangode namachim,” ine Sangma aganaha.
Ia neng•nikaniko namatna gita sorkari kamko ka•enga ine janapatengon, pilakkon ia kamo bakrimchina gitaba ua didiataha.
