25 C
Tura

UDP-oni adita sak dilgiparang ianpakni eleksino chena cholrang dongjaha: Pa Lanong

Must read

Shillong, Jan 20: Politics-o kam ka·bagipa saksa a·gipi dilgipa aro Legislative Assembly-ni agan-chalaitimgipa gitcham aro KHADC-ni gitcham CEM Pa Bindo Lanong, United Democratic Party (UDP) doloni da·o dilgipa ong·enggipaoni bang·batan kam bon·tokgnok aro ianpakni eleksino chena gita uamangna cholrang dongjaha ine Sukrobar salo aganangaha.

UDP-ko bi·satang gita chanenggipa Pa Bindo, UDP dolko bikotdilchenggiparangoni saksa ong·pagenchimoba, ianpakni eleksino Nongkrem constituency-oni susana gita party ticket-ko on·na jechakako man·ahachim, jenan ua, an·tangko nichanggalanina aro mija mangmang MLA-oni kam watgipa Pa Lambor Malngning-na ticket-ko on·skaanina dolko matnange aganangaha.

“Sakgipinrangna party ticket-rangko on·e cha·bokanio jak donggipa sakgni ba sakgittam dilgiparangni kam da·on bon·aijok aro chepiltaina gita uamangna cholrang dongjaha”, ine parakatan baksa, Pa Lanong, pilakchin an·tangna chakgiparang bang·en gnangchim, aro ka·mabatgipa gadangoni kamko ka·e manderangkoba grongtokmanahani gimin an·tangko ia eleksino chena ka·dongbatenganiko aganangskaaha.

UDP dolo iandakgipa obosta ong·engani ja·pangara dilgiparangan ong·a ine matnangenba, Pa Lanong, UDP-ko a·bachengatani somoio uamang dongtokjachim, politics-on uamang dongtokkujachim aro gimikan angnide chonbatgiparangsa ong·aiachim ine janapatan baksa, 2013 bilsio anga Pa Jemino-ko rimbaaha aro cheba-cheaha, 2008 bilsio Pa Metbah Lyngdoh, UDP dolo napeaha, UDP dolko 1997 bilsio bikotchengmitingo uamang bachitoka ine sing·doangenba, 2009 bilsio Pa Paul Lyngdoh-ba dolo napeaha, uni gimin angni aganbagimin gita, doloni sakgni ba sakgittam dilgiparangni kam da·on bon·gnok aro manderangba kamni kri uamangna chotpilskagen, ine Pa Lanong agandapataha.

More articles

-->
-->

Latest article