Shillong, Feb 21: East Khasi Hills a•jani ukil Erwin K Sutnga, Sombar salo Indian National Congress (INC) dolo napangaha aro uko INC-ni working president PN Syiem, MDC Charles Marngar aro gipin dilgiparang rimchaksoaha.
INC-o napanggipa Erwin K Sutnga, 2018 bilsini Assembly election-o NPP-ni candidate ong•e susaahachim indiba ua 500 vote-rangkosan man•rikaiahachim.
Sutnga-ko INC-ona rimchaksoani somoio INC-ni working president PN Syiem, jinmana aganprakengon, uni Congress dolona re•baania dingtang dingtang kamrangko ka•anio Congress dolko mangrakbatatna dakchakani ong•gnok ine parakangaha.
Ia tom•anio Sutnga-ba jinmana aganprakengon, India a•songo Congress dolmangmangsan mikkang niteani gri kamko ka•gipa dol ong•a aro namroro silroroaniko ra•baanio kakketgipa dol ong•a ine INC-ko mittelpile aganangaha.
A•doko niam gri koela bikotanirangko champengna man•jaengani gimin MDA sorkariko matnangatengon, niam gri koela bikotaniko CBI-chi inquiry dakna gita sakkiko am•aniara ia sorkarina namen kratcha•na nangani ong•enga ine Sutnga parakataha.
