Shillong, April 12: Russia aro Ukraine dakgrikani a•selo Ukraine a•songo medicalko poraienggipa chatro-chatrirang poraiatangtangko watgale songtang-noktangona pil•bana nangaha. Mikkangchi uamangni janggi tanganina aro poraidapangkuanio mamingba neng•nikaniko man•jana gita India sorkari maiaba cholko dake on•skana niame kamrangko ka•na jotton ka•enga. India a•songo medical collegerangko rikani aro uko a•bachengatna nanganiba baririkrikengaha. Unigimin Indiani bang•a a•dokrangon medical collegerangko kulina nangengjok. Salgro-salaram a•doko Assam na agrede gipin districtrango medical collegerang dongpaja unigimin ia a•dokrangoba medical collegerangko rikna nangengahachim.
Meghalaya a•dokni bang•a chatro-chatrirangan medical college-o nape poraipana chol ong•jaenga. Meghalaya a•dokko man•chengaoni bilsi 50 ong•pilahaomangna medical collegerangko rikna man•kujaenga. Iarangni bidingo tang•doatna miksonge Meghalayani private university USTM jotton ka•engahachim. Ia universityni gita ge•sa medical collegeko a•bachengatna miksonge kam ka•anio tangka-paisa aro sorkarini maming gisik on•aniko man•jae chu•soksrangna man•kujaenga. “USTM ni gita ge•sa hospital baksana medical collegeko a•bachengatna kam ka•anirang bimang ong•srangna man•kujaenga, iana bang•bea korosrangko aro sorkarini dakchakpaanikoba nanggen” ine USTMni Vice Chancellor Mehbool Haque aganaha.
