Williamnagar, Nov 11: Rim·ako man·na nangenggipa ULFA (I) bobil dolni dilgipa Dristi Rajkhowa-ni da·al Butbar salo South Garo Hills-ni Dilsengre songo Army-na bame on·anganio Meghalaya Police uamang baksa re·chapangaha. Rajkhowa, an·tangko bame on·na gita songsul a·song Bangladesh-chini Gaobari song gita ga·bate re·baaha.
Rajkhowa, jean ULFA (I)ni Deputy Commander in Chief ong·a, Bangladesh-o bobil dolrangni kosako ja·kolko sanna bilake kam ka·atengani gimin ua biaponi katbae an·tangtangko bame on·na sikaniko army officialrangna koborko on·ataha ine East Garo Hills-ni Superintendent of Police, Bruno Sangma, Hub News-na agan-talataha.
Mijamangmango, South Garo Hills-ni Bolbokgre songo police dolrang baksa gogrikangani somaio kate jokangna man·anikoba Rajkhowa parakaha ine Sangma agandapaha.
Bame on·gipa Rajkhowa-ara GNLA bobil dol baksa sambae kamko ka·gipa ong·achim, indaken batanggimin 2014 oni 2017 bilsirangni gisepo GNLA bobil dolni Garo Hills-o bilake wenmiting somaio bobil dolni ong·gijagipa kamrangko ka·na gitaba ukon jakkalrongachim.
“Rajkhowa-ni Army officialna bame on·nasiani koborrangko man·anio pangchake, Meghalaya police ramani mongsonggipa biaprango police-rangko adita bang·en donataha, indake attam 6:30 bajimango bolgni garirangko Nongal-o rim·rikaha,” ine police chief iako agane, Rajkhowa baksana ULFA (I) bobil dolni sakbri gipinrangni gario dongpaanikoba ma·sina man·aha, ine agandapataha.
Uamang gimikan, Assam-o register ka·gimin jeni nomborrangan – AS 01 AK 9102 aro AS 01 EA 4659 ong·a, ia bolgni garirango songrebaengachim ine Sangma talataha.
Rajkhowa baksa re·chapbagipa gipinrangara – Lakhipur-ni Yashin Ali (25) jekon Axom ine mingklaka, Krishnai-ni Rup Iyoti Rabha (25) jekon Lombu ine mingklaka, Goalpara-ni Babul Rabha (22) jekon Babul ine mingklaka aro Moran-ni Rahul Hazarika (27) jekon Laden ine mingklaka.
Indake ong·engon, Police-ni uamangoniko sandirikkitaton adita silchidarerang aro gulli-barutrangkoba man·aha, uarangara – bolsa AK-81, ge·gni 9 mm pistol, AK-81 gulli (rong 90), 9 mm gulli (rong 9) aro .32 gulli (rong 8).
