Shillong, Feb 27: Shillong songjinmani salgro jolo donggipa Umiam Lake-ko ripingna gita roadmap-ko tarina songe dongimin committee, re·baenggipa Mongolbar salo ia biapo ong·enga obostarangko ma·sie ra·na gita re·anggen.
Ia Umiam Lake ba wariara 1960 bilsio Umiam chibimako dam kae bijoli bikotna tarigipa wari ong·a aro ian Meghalaya a·doko gitchambatsranggipa lake-ba ong·engachim.
Committee-ni tom·aniko ong·atanio, dingtang dingtang department-rang, jekai Forest & Environment, Power, Tourism, Fisheries, State Pollution Control Board, Khasi Hills Autonomous District Council aro uandakgipa gipin department-ni dilgiparangba dongpae bak ra·angaha.
Forest & Environment department-ni Commissioner & Secretary Syed Md Razi-ni u·iatani gitade, ia tom·anio Umiam Lake-ko taridapna gita committee adita chanchiangaha aro da·o ia committee, ia biapona re·angenba, maini a·sel ia lake ba wari nosto ong·angengachim, a·selrangko sandigen.
Ia biapko nieani ja·mano ia committee apsan tom·taigen aro a·doko songdongenggipa manderangni namgnina ia wariko taridapani bidingo chanchirimanggen ineba Md Razi parakataha.
High Court-ni ge·etaniko on·angani ja·mansa, ia Umiam Lake-ko rongtalatpilna aro ripinge rakkiangna gita a·dok sorkari, dingtangmancha committee-ko songe on·ahachim ine nikna man·a.
