Shillong, March 10: Mija Bristibar salo tong·tang-tong·tang dakgimin manggisiko Umiam Lake-oniko man·gipa saksa Omeka Myrthong minggipako ka·saninggija dake so·otanio jak donga ine chanchichipenggipa sakgni manderangko rim·na gita Meghalaya Police ja·kol sananiko a·bachengataha.
Iani bidingo Meghalaya (Eastern Range)ni DIG, Davis N R Marak-ni Sukrobar salo koborni manderangna aganangani gita, sianggipa mande baksa ripeng ong·gipa sakgnikon Myrthong baksa bon·kame manderang nikahachim jemangan da·o kate chakenga ine DIG u·iataha.
DIG-ni u·iatani gita, sianggipani mitam be·enni bakrangko Umiam lake-oniko skanggipao man·ani ja·man, siani a·selko taljani gimin ong·bewalo sigijani mamlako police segataha, indake ong·oba, Brisitibar salo Umiam-o bimangko rate porikka ka·aniko dakangenba a·bachenge sandiatanio sianggipa mandeni gimaaniko Lumdiengjri PS-o re·anggipa March 3 tariko segataniko ma·sina gita man·skaahachim.
“Ia mande, re·anggipa February 26 tarikonin gimana nanga ga·aka, indiba uni gimaaniko March 3 tarikosa segatskaaha”, ineba DIG u·iataha.
Ua mandeni gimaaniko segatani gimin am·sandiataniko dakmitingosa Lumdiengjri PS-ni police-rang, uni ripeng sakgnikon sianggipa mande baksa apsan bon·kame nikaniko ma·sina gita man·aha, jemangan ua somoio chu ringna nanga ga·aka ine DIG Pa Marak koborna u·iatangaha.
Ia mamlara Umiam a·jani ning·o ong·aniko talani ja·man Zero FIR-ko Umiam PS-o segatchengaha aro mamlako ja·mano Lumdiengjri PS-china ra·angskaenba ua sakgni kate chakenggipa manderangko rim·na gita police-rang am·sandianiko a·bachengataha ineba DIG koborna parakataha.
