Shillong, July 5: East Khasi Hills a·jao Umngot Hydro Electric Project (UHEP)-ko jegalna bikotagipa Joint Action Committee (JAC)-ni tom·aniko Sombar salo Shillong songjinmani Jaiaw-o donggipa KSU office-o ong·atangenba, ia project-ko chu·gimik ra·galchina gita sorkario dabiangaha.
JAC-ni saksa dilgipa aro Jaintia Students Union (JSU)-ni general secretary Treibor Suchen-ni parakatani gitade, ia UHEP-ko ra·gatanichi ia Umngot chiringo pangchake janggi tangtokenggipa neng·nikanirangko man·na nanggen, samtangtango ong·telaigiparangnaba nangchakeaniko ra·bagen aro Tribal-rang an·tangtangni a·arangko gimaatna nanggen ine niksamsoengani gimin ia project-ko dingtang dingtang dolrangsan ong·aigija ia chiringni ka·ma kosak aro samtangtango songdongenggipa manderangba jegaltokengachim.
Ia project-ko jegalatengon, ia UHEP-ko ra·gatgenchimode komibeoba dam 20-oni dam 25 songrang nangchakeaniko man·gen ine JSU-ni general secretary parakatenba, ia project-ko a·bachengatna skangba sorkari, manderang baksa agangrikchengjaha aro Environmental Impact Assessment (EIA)-ni niam gitade ia jolrangoniko No Objection Certificate (NOC)-ko ra·chengna nangachim ine talataniko on·angaha.
Iani bidingo NGO-rang, re·anggipa jaon a·dokni Chief Minister Conrad K Sangma-na memorandum-ko on·manahachim indiba da·onan chief minister, iani bidingo aganchakaniko on·kuja aro una on·gipa memorandum-ni receipt copy-koba on·kuja ineba JAC-ni dilgiparang parakataha.
Indake ong·engon, iani bidingo JAC-ni dilgiparang, a·dokni Chief Minister-ko gronge agangriktaigen indiba ia project-ko ra·galpilna sorkari jechakgenchimode mikkangchi JAC rakbata ja·kuko de·anggen ine Suchen parakataha.
