Shillong, Oct 7: Union Home Minister Amit Shah baksana BJP-ni president JP Nadda, dingtang dingtang program-rango bakko ra•na gita Sukrobar attamo Guwahati songjinmaona sokbaaha.
Amit Shah aro JP Nadda-ko Assam a•dokni Chief Minister Himanta Biswa Sarma, Union Minister Sarbananda Sonowal, BJP-ni state president Bhabesh Kalita aro BJP-ni MP-rang, Guwahati airport-o rimchaksoaha.
Assam-ona re•baani somoio Amit Shah, Assam-o chi bananichi neng•nikanirangko man•enggipa manderangni bidingo dingtangmancha Assam a•dokni dilgiparang baksa chanchirimanggen aro Assam a•doko BJP dolna kam ka•enggipa aro dilgiparang baksaba tom•e chanchirimanggen.
Amit Shah aro BJP-ni president JP Nadda, Guwahati songjinmani Beltola-o gital rikgipa BJP-ni office-koba nokdonggae on•anggen aro Khanapara Veterinary Ground-o BJP-ni membor-rangna aganprakanggen.
Iani ja•mano Amit Shah, salgro salaram a•dok gimikni chief minister-rang, chief secretary-rang aro director general of police (DGP)-rang baksa tom•enba, drugs ba pekatgipa sam badinganiko champengani bidingo chanchirimanggen.
Sonibar attamo ua dingtangmancha North Eastern Space Application Centre (NESAC)-ni bidingo tom•e chanchirimangskagen.
Robibar pringo, Union Home Minister, Kamakhya Temple-ona re•ange bi•anirangko dakanggen aro uni ja•man, North Eastern Council (NEC)-ni tom•bimonganio aganprakangskagen.
