Guwahati, April 13: Batanggimin konta 24-ni gisepo bisigrak dambongko cha·mangipa sak 35-ko Assam Medical College and Hospital (AMCH)-ona ra·bae sanengon sak 13 manderangde siaha. Bisigrak dambongko cha·mangiparangara mongsongbate Charaideo, Dibrugarh, Sivasagar aro Tinsukia-oni ong·toka ine Dr Prasanta Dihingia kobor-na ui·ataha.
Sakbride re·anggipa sombar salo siaha aro sak 9-de mongolbal salo siaha. Bisigrak dambongko cha·manani ja·manano ok sa·dika, sko miksula aro chigala dake saaniko man·chengachim. Buringni bisigrak dambongko cha·achi bilsirikitan indaka obostarangko chagrongenga. Ian mongsongbate badia cha·na namgipa badia namgija uko manderang ui·jaani a·sel ong·batenga ineba Dr Prasanta agankuaiaha.
