Shillong, Nov 3: Upper Shillong gita gari bolbri re·sretgrikna man·e apalgipa ramako tariatnasienggipani bidingo sing·sandianiko dakna gita, Upper Shillong-ni Synjuk Ki Nongsynshar Shnong, Butbar salo a·dokni dakchakgipa skotong minister Pa Prestone Tynsong-ko grongangaha.

Synjuk Ki Nongsynshar Shnong-ni, a·dokni dakchakgipa skotong ministerna on·anggipa chittio janapatani gitade, ia apalbegipa ramako Upper Shillong gita tarianiko jinmaan ru·uta bilsirangoni nangnike dongenga aro ia apalbegipa ramako tarianichi manderangni janggi tanganio gimikni gitan namgniko on·gen aro gari-gorani sket-changket dakanikoba komiatna dakchakgen.

Indake ong·engon, ia apalbegipa rama ba 4 Lane-ko tarianio mingsa neng·nikaniko man·enggipa, chong·motan forest a·ani ning·ogipa meter 100 mangni gisepo ringani chiko salna pipe gopengani gimin Forest Department-oni champenganiko man·engani giminba Synjuk, chanchianiko ra·bajolaha aro rama tariatani pilak kamrang name matchotna man·na gita uoniko dakchakanikoba am·angaha.