Shillong, Oct 3: Chanchie ra·baenggipa medical college-ko University of Science and Technology Meghalaya (USTM)-o rikna gita dal·bee tom·aniko ong·atenba Sombar salo pangchakaniko songe on·anganichi ERD Foundation Guwahati aro uko kullidilchenggipa Chairman Mahbubul Hoque-ni nikjumanggipa project, “P.A. Sangma International Medical College & Hospital”-ni be·en pil·na gita a·bachenganiko nikna man·aha.
Medical college-ko rikna gita, USA-ni Global Leader, Rhonda Vetere-ni dongpaani baksa, Meghalaya-ni Governor gitcham R.S. Mooshahary, Home aro Education-ni minister Pa Lahkmen Rymbui, AIIMS-ni gitcham director Dr R. C. Deka, Srimanta Sankaradeva University of Health Sciences-ni VC, Dr Dhrubajyoti Borah, AMU-ni gitcham VC, Lt. Gen. Zameer Uddin Shah, USA, Medicine-ni Prof, Dr Abdul Wase, EO, USA-ni Managing Partner, Pa Faisal Masood, Meghalaya, Jirang constituency-ni MLA, Pa Sosthenes Sohtun aro dal·dalgipa aro niksenggipa gipin sokgiparang gimikni dongpaanio a·dokni skotong minister Pa Conrad K Sangma, pangchakaniko songe on·angaha.
With the standards that @USTMeghalaya upholds and the service that it continues to render Meghalaya and the North East, the P A Sangma International Medical College & Hospital will surely be a blessing to the region. pic.twitter.com/2ABuTuSX3P
— Conrad Sangma (@SangmaConrad) October 3, 2022
USTM-o dal·e tom·anganio, a·song gimikchini aroba salgro-salaram gimikchini niksenggipa doctor-rangba dongpae bakko ra·angtokaha. Pangchakaniko songe on·ani ja·man a·dokni skotong minister jinmana aganprakangaha, indake rimchaksoani kattarangko USTM-ni VC, Pa Mahbubul Hoque-chi on·angaha, presidential speech-ko Governor gitcham Pa R.S. Mooshahary on·angskaaha.
Unbaksana, kobor ra·timgiparang press conference-koba ong·atjolaha jeon Rhonda Vetere aro Pa Mahbubul Hoque-maang koborni manderangna talatanirangko on·angaha.
Unomiting, koborni manderangna aganangengon, “Ia Medical College and Hospital-ni mongsonggipa bakara ia hospital, palang ge 200 gnanggipa super speciality ong·gen jeon chasongni kri sana-bananio nanggipa technolgy-ni bosturang donggen ine aganatan baksa, ia hospital-o pilak saenggipa kangal-cholgrirangna damgri indin sana-banani cholrangko on·anggen aro Meghalaya-ni manderangna chu·gimik service-an indin ong·gen ine Pa Hoque parakataha.
Uni aganangkuani gita, ASEAN a·songrangchini pilak sagipa-ding·gipa aro chatrorangko salbakbana gita nisanko donesa ia institution-ko ra·baenga ine aganatan baksa, a·bachenggipao, mongsongbate Bangladesh, Nepal aro Bhutan-chini sagipa-ding·giparang aro chatrorangna dingtangmancha nisanko donenga ineba talataha.
Unomiting, Rhonda Vetere, koborni manderangna agan-talataniko on·angengon, USTM-ni global ambassador ong·anina ua an·tangni kusi ong·aniko parakatenba, university-ko tang·doatna aro silroro-namroroatna aro iako a·gilsak gimik baksa nangrimatna an·tango bil donga gita gimik dakaon dakchakanirangko on·anggen ine ka·dongataniko on·angaha.
Technology-ni gita sana-bananio nanggipa pilak bosturang donga baksanaba, ia medical college and hospital-o air ambulance facility-ba donggen aro ambulance service-rangko Guwahati aro Shillong-o man·gen. Doctor-rangko gronganio maming neng·nikanirang dongjana gita aro ambulance service baksana minggipin cholrangna mobile app-ba donggen ine talataniko on·anga baksana, sana-banani a·barango USTM, National aro International seminar-rang aro conference-rangkoba ong·atgen aro iana salgro-salaramchini maiba agan-ku·pattianirang dongode uarangko chinga rimchaksoa, ineba Hoque janapataha.
Ia university-ko a·gilsak gimikchin niksengatna miksonganiko done kam ka·engani gimin, university-na a·gilsak gimik baksa nangrime kamko ka·na man·na gita USTM, New York-ni global leader aro author aro technology-o nambatsranggipa sak 50 me·chikrangoniko Madam Rhonda Vetere-ko dingtangmancha seokangaha.
