Shillong, May 12: Meghalaya a·doko songpanggipa jatgittamna nangchakegipa mamlani bidingo da·ororo dingtang dingtang dolrangni gisepo jera-ra·grikanirang ong·katengon, reservation policy-ko a·dok sorkarini tik ka·e on·kujana kingking mande rim·ani kamrangko dontongatchengna gita Voice of the People’s Party (VPP) dol, Sukrobar salo konta 48 somoirangko a·dok sorkarina on·angaha.

Iani bidingo koborna u·iatanganio, VPP dol, job reservation policy-ko nipiltaiatenba taridapna nangengani gimino a·dok sorkari ia mamlako tik ka·e on·kuja dipet, iana skang chingni molmolanga gita sorkarini dingtang dingtang department-rangna mande rim·anirangko dontongatchengna u·iataniko on·china, chu·gimik konta 48 somoirangko sorkarina on·enga ine janapatenba, ia konta 48 -ni gisepo sorkarioni maming u·iatani dongjagenchimode, uamang jingjengataniko a·bachengatgen ine VPP dol, sorkariko mikrakatangaha.