Tura, April 8: West Garo Hills aro South West Garo Hillsni a•king nokmarangna Tura Walbakgreni Green Haveno Tura Range Forest officerni gita salsani programko ong•atangaha. Ia districtrango niam gri ro•ong kuliani aro ro•ong chikkrimani kolrangko ra•bae chalaigiparang dongani gimin, nokmarangna talatanirangko on•a miksonge ia tom•aniko ong•atangaha. Tura territorial rangeni Range Forest officer Quartus Chongkim B Marakni aganani gitade, Mines and Minerals Act, 1957 ni bidingo aroba Amendment of Meghalaya Minor Minerals Concession Rules 2016-ni bidingo bak ra•gipa nokmarangna agan-talate on•angna man•aha. “Je biapoba skatang ro•ong quary ba crusher machinerangko kuliramramna man•ja. Iana on•gimin amendment 4 ni gita soroksamoni, mande dongdonggipa songoni aro uandake manderangni jakkaltogipa biaprangoni metre 200 chel•aosa iarangko dakna man•a” ine officer aganaha. Unigimin ua nokmarangko, an•tangtangni a•kingtangtango simsake aro niamko ja•rike ka•china didiangjolaha.
Ro•ong bikotani aro uko chikkrimani kolrangko chalaianio dingtang dingtang niamrangko u•ie ra•ani bidingo Tura police station ni circle Inspector Bitching Marakba nokmarangna talatangaha.
