Tura, Dec 14: Sakdok manderangchi gital dolko bikotgipa Jengjal Melomaniacs, West Garo Hills a·jani ning·ogipa Jengjal songo skanggipa changna re·anggipa anti Sonibar salo “Street Mini Music Festival,” -ko ong·atangaha ine ja·manchakbee koborko on·ataha.
Ia manianiko ong·atna gita, joltangni MDC Pa Grahambell A Sangma dakchakanirangko on·aha.
Melomaniac-ni miksonganiara ring·ani aro doka-damanina gisiko nanggipa ine ong·a, aro ia miksonganion uamang dol a·jaoni pilak doka-damanina namen ka·oksigiparangna dingtangmancha ia programko ong·atna miksongaha ine festival-ko ong·atgipa dol koborna seachi janapataha.
Ia festival-ko ong·atanio uamangni dingtangmancha miksonganiara, chasong damberangko doka-damaniona rimbana aro songoni manderangko doka-damanina gisiko nangatna gita ong·a, maina bang·a chasong damberangoni mitamrang git ring·na, dokna-damna namen changgipa-sapgipa aro gisiko nanggiparang gnang indiba ga·chatchengani cholrang dongbrejani a·selo uamang an·tangtangni changa-sapanirangko mesokna gita cholko man·tokjaenga ineba uamang janapataha.
Programo, joltangni manderangna aro a·palchini manderangna git ring·susaanikoba gadanggni dake ong·ataha, jeon bilsi-bonga ong·gipa bi·sarangoni a·bachenge bilsi-sotbongaona kingking ja·delgimin manderangna git ring·susana gita cholrangkoba on·aha aro Garo Hills gimikchini ring·giparangna agreba, a·palrangchiniba bang·a manderangan ia ring·susaanio bakko ra·angtokaha.
Ring·susaanio chegiparangna boksis baksana doka-damani bosturangko on·angaha aro professional music degree-ko man·gimin manderangchin uamangni ring·susaanikoba chekangaha.
Iarang pilakni ja·man, A·chik a·songoni dolsa niksenggipa band, ‘Da Suraka’ aro Krismas gitko ring·e mingsinggipa saksa git ring·rakgipa Pa Marcus D. Shira-maangba bang·a manderangni mikkango uamangni namnamgipa gitrangko ring·e mesokangjolaha ineba uamang koborna u·iatjolaha.
