Tura, May 16: West Garo Hills a•jaoba COVID-19 ta•raken batrikrikengahani gimin COVID-ni batrikrikaniko champengna gita District Administration, salantian attam 2:00 bajioni pring 5:00 bajiona Corona Curfew-ko Sombar sal dipet ra•gatangaha.
Attam 2:00 bajioni pring 5:00 bajiona curfew-ko ra•gatengahani gimin May 17 tarikoni re•baenggipa May 24 tarikonade nangchongmotgipa bosturangko palenggipa dokkanrangba pring 8:00 bajioni attam 1:00 bajionasan kulina man•aignok ine West Garo Hills a•jani Deputy Commissioner Ram Singh u•iataha.
Hardware, electrical, computer tarigipa, mobile tarigipa, gari tarigipa aro uandakgipa dokkanrangko Mongolbar aro Bristibar salrangosan pring 8:00 bajioni salni 1:00 bajiona kulina on•gen aro nangchongmota ong•gijagipa gipin dokkanrangkoba Mongolbar aro Bristibar salrangosan pring 8:00 bajioni salni 1:00 bajiona kulina man•gen ine Deputy Commissioner u•iataha.
Assam a•dokni sima ari jolo donggipa Singimari-oni Tikrikilla-onade nangchongmotgipa dokkanrangko salantian pring 8:00 bajioni 12:00 bajiona kulina man•gen indiba nangchongmota ong•gijagipa dokkanrangkode Mongolbar aro Bristibar salrangosan pring 8:00 bajioni salni 12:00 bajiona kulina man•aigen ine DC u•iataha.
Sonibar aro Robibar salode chu•gimik lockdown ong•angkugen indiba ia salrango nangchongmota bosturangko salbaenggipa garirangkode re•rurana on•skagen.
