Shillong, Oct 12: West Jaintia Hills a•jao Meghalaya State Skill Development Society (MSSDS)-ni ning•o Mihmyntdu Community Social Welfare Association (MCSWA)-ni ‘Home Health Aide’-ni bidingo jagittamna ong•atenggipa Skill Training program-ko Budbar salo a•bachengataha aro ia training program-ko a•bachengate on•angani somoio West Jaintia Hills a•jani Additional Deputy Commissioner (ADC) DD Syngai, mongsonggipa sokgipa ong•e bakko ra•angaha.
Ia jagittamna ong•atenggipa training program-o gimik sak 30 manderang skie ra•enga aro ia program-ko a•bachengatani somoio West Jaintia Hills a•jani ADC DD Syngai, jinmana aganprakengon, songsalni namgnina iandakgipa program-rangko ong•ate kamko ka•engani gimin MCSWA-ko mittelpilangaha.
Ia training program-ko ong•atani bidingo Dr Norman Tunnel Hospital-ni Medical Superintendent Dr N Nongpluh, talataniko on•angskaengon, sagipa manderangko maikai nirok sandina nanga, uarangni gimin skie ra•enggipa manderangna skie on•anggen ine parakangaha.
