Jowai, Dec 3: Meghalaya a•dokni bilsi 50 gapaniko maniani bak gita aro India a•songni jakgitelaoni bilsi 75 gapaniko maniani bak gita Meghalaya a•dokni Arts & Culture department, Sports & Youth Affairs department baksana Amlarem Sub Division-ni Sub-Divisional Office aro Seng Samla Shnongpdeng Cultural & Sports-ni gita nangrime, West Jaintia Hills a•jani Shnongpdeng songo donggipa Umngot chibimao skanggipa changna Umngot Water Sports Festival-ko ong•atangaha. Ia Water Sports Festival-ko ong•atanio a•dokni Home Minister Lahkmen Rymbui, skotong sokgipa ong•e bakko ra•angaha aro ia program-ko ong•atanio Arts & Culture department-ni Commissioner & Secretary FR Kharkongor, Information & Public Relations-ni Secretary & Director M War Nongbri, Sports & Youth Affairs-ni Assistant Director PB War Nongbri aro gipin officer-rangba dongpae bak ra•angaha.
Ia Water Sports Festival-ko ong•atanio a•dokni Home Minister, jinmana aganprakangengon, Shnongpdeng songni Umngot chibimao ia Water Sports Festival-ko ong•atahani gimin Arts & Culture department, Amlarem-ni Sub-Divisional Officer, District Sports Officer aro Seng Samla Shnongpdeng Cultural & Sports-ko mittelpilangenba, ia chibimara mingsing minggamako man•gimin chibima ong•ani gimin mikkangchi ia biapko nina re•baenggipa manderangna ia biapko rongtale rakkiangkuchina aro gipin biaprangoni re•baenggipa manderangko name sokachakangkuchina gita jolni manderangko didiangaha.
Namroro silroroaniko ra•bana gita sorkarini a•bachengate on•gipa dingtang dingtang program-rangni gimin aganangengon, Shnongpdeng-o donggipa hanging bridge-ko taridapna sorkari gong lak 20-ko chame on•manaha ine Rymbui parakataha.
Ia tom•anio Arts & Culture department-ni Commissioner & Secretary FR Kharkongor-ba jinmana aganprakangengon, ia jolrango tourism-ko tang•doatna aro chio kal•susaanirangko namdapatna miksonganiosa ia Water Sports Festival-ko ong•ataha ine parakangenba, mikkangchi ia jolrango namroro silroroaniko ra•bana gita sorkari baksa bakrimangkuchina gita songni manderangko didiangaha.
Ia festival-ko ong•atanio ring chosusaani, jrosusaani, Water Polo aro uandakgipa kal•susaanirangko ong•atangaha aro chegiparangna Home Minister-ni jakchi boksisrangko suale on•angaha.
