Shillong, Oct 11: Meghalaya aro Assam a•dokni simarango meligrikna man•jaenggipa bangki biaprangni gimin agangrikaniko a•bachengatna gita West Khasi Hills regional committee-ni skanggipa tom•aniko re•baenggipa Sukrobar salo ong•atna tik ka•aha ine Mongolbar salo Meghalaya a•dokni Cabinet Minister aro regional committee-ni chairman Renikton Lyngdoh Tongkhar parakataha.

Tongkhar-ni parakatani gitade, ia tom•aniko Sukrobar pringo Nongstoin-o ong•atanggen aro ia tom•anio committee-ni membor-rang, ia kamo bak ong•enggipa dingtang dingtang dolrangni nangnikani aro chanchianirangko ra•ani bidingo chanchirimanggen.

Kamrangko ka•anio regional committee-ni chagrongna sienggipa neng•nikanirangni gimin janapatengon, kamrangko ka•anio manderangni nangnikani gita chu•gimikde ong•janaba gnang indiba ia committee man•a dipet manderangni nangnikanirangko chu•sokatna jotton ka•gen ine Tongkhar parakataha.

Je songrangan Meghalaya a•dok ning•o ong•na nangnikenga, uandakgipa songrangko Meghalaya a•doko donna man•gen ineba ua an•tangni ka•dongchakenganiko parakataha.