Williamnagar, Mar 22: March 22 tariko gitalgipa Healthcare Multispecialty Polyclinic-ko Williamnagar elaka-ni MLA Pa Marcuise N. Marak, East Garo Hills District ni DC Pa Swapnil Tembe, Williamnagar ni MDC Pa Alphonsus R. Marak aro gipin agipi dilgiparangni dongpaanio oprake on·angaha.
Tom⋅a a·bachengo Dr. Conrad K. Marak, ia Polyclinic-ko maidake kuliaona sokatahachim uni bidingo talatengon, salsao ua Pa Hasmudin Ahmed baksa Goalpara ona songreangmitingo indonga porikka ka·chakram a·tipko Williamnagar songjinmao bimang ong·atna man·ode manderangna namen dakchakbeani ong·genchim ine agan golpogrikanirang Pa. Ahmed ni gisikko su·tike tangka paisa rangko jaksrambee dakchanichisa bimang ong·aha ine janapaha.
Tom⋅anio Educere School ni Headmistress aro Meghalaya Women Commission ni member Ma.Gamchi Timre R. Marak ia indakgipa an·seng baljokani a·bao porikka ka·chakram ko Williamnagar-o nangchongmotachim aro iako kulianichi jolni manderangna namen dakchakbeani ong·gnok ine uko bimang ong·atgipa sakantiko de·mitelangaha.
Williamnagar ni DC Pa Swapnil Tembe ba ia polyclinic-ko Williamnagar-o kuliani gimin an·tangni kusi ong⋅aniko parake kuligiparangna nama sikaniko on·angaha.
Mongsonggipa sokgipa ong⋅e joltang Williamnagar ni MLA Pa Marcuise N. Marak an⋅tangni kusi ong⋅aniko parakengon ia indaka kamko ka⋅aniba mingsa jatna kam ka⋅ani ong⋅a aro sana bana ni a·bao bang·bata sabisi rangko porikka ka·e nianirangkon ia RX Multispeciality Polyclinic-o ka·na man·engahanina uko be·en pil·atgipa sakantikon mitelaha.
Ia gitalgipa RX Healthcare ko Reverend Dallim Sangma Nokgipa Isolni bilko bi·e pakwatangaha.
Tom⋅a matchotan ja·mano RX Healthcare ko kulina didigipa-ko ia healthcare-o maimaiko sana-bana mangen ine Hub News dingtangmancha singaniko dakon Dr. Conrad K. Marak ia healthcare-o namnamgipa doctorang, namgipa ultrasound ka⋅ani kol, namgipa laboratory aro namgipa samrangko man·gen ine aganaha.
Bon·kame Hub News RX Healthcare ni nokgipa Pa. Hasmudin Ahmed ko maina iako kuliaha ine sing·on “anga Williamnagar-onisa angni chongipa bading chiwalaniko a·bachengaha aro Williamnagar-o dongen anga ia gadangona sokaha, uni gimin ia jolni manderangna anga on·pilskagita iako a·bachengaha je dakode manderang an·tangtangni saa biati rangni bidingo joltangon porikka ka·e nie namgipa sana bananiko dakna man·gen una misongoanion ong·aha ine Pa. Ahmed aganchakaha.
