Shillong, Dec 16: Meghalaya a•doko songdongenggipa manderang, Krismasko manina a•bachengtokengahaon, a•doko skanggipa changna ong•atenggipa Winter Tales Festival-ko Bristibar salo, a•dokni Chief Minister Conrad K Sangma, Shillong songjinmani Wards Lake-o a•bachengate on•angaha.
Ia Winter Tales Festival ba manianiara joltango ma•manti changa sapani donggipa manderangko aro uamangni bosturangko ra•dona miksonge ong•atenggipa festival ong•a aro ia festival-o joltangonisan ong•aigija a•gilsakni dingtang dingtang biaprangoniba manderang bakko ra•enga.
Ia festival-o kuligipa stall-rangko niangani somoio a•dokni Chief Minister, dingtang dingtang bosturangko tarigipa manderang baksaba agangrikna cholko ra•aha.
Ia Winter Tales Festival-ko ong•atani bidingo kobor ra•timgipa manderang baksa agangrikengon, Krismasko maniani somoio, changa sapanirang donggipa manderangnaba cholrangko on•na gita ia festival-ko ong•ataha ine Sangma parakataha.
A•doko songdongenggipa manderangna an•tangni Krismasni namgipa skaniko parakatengon, ia festival-ona re•ange bakko ra•echina gitaba Chief Minister didiataha.
Ia Winter Tales Festival-ko sorkari, bilsiantian ong•atna aro nambatatna gita miksongenga ineba Sangma parakataha.
