Shillong, Sept 27: West Khasi Hills a•jao be•enni gita cholgri ong•e bading chiwale cha•enggipa Justipassing Rynthathiang-na Meghalaya a•dokni Chief Minister Conrad K Sangma, dingtangmancha re•a doanio dakchakaniko on•na ku•rachakangaha.Adita salrangna skangsan, E-Challenge Entrepreneurship program-o Rynthathiang, an•tangni bading chiwalani kamna dingtangmancha boksisko man•e mingsing minggamako man•ahachim.

Uni salanti janggi tanganio uni chagrongna nangenggipa neng•nikanirangko nike sorkari una dingtangmancha dakchakaniko on•gen ine Chief Minister parakataha.Be•enni gita cholgri ong•e bading chiwalenggiparangna dakchakanirangko on•engani gimin GHP Raju aro Social Welfare department-ko mittelpilangengon, Rynthathiang-ni kamrango ia department una dakchakanirangko on•angkugen aro ua an•tangni kamrango chu•sokgipa ong•anggen ine Chief Minister, an•tangni ka•dongchakenganiko parakangaha.
Rynthathiang-ni kamrangan mikkangchi be•enni gita cholgri ong•gipa a•dokni gipin manderangna didiani gita ong•gen ineba Sangma, an•tangni ka•dongchakenganiko parakataha.

Wheelchair-ko Chief Minister’s Special Grant-ni ning•o gong 90,000 ong•e breahachim.
Da•o dipet a•doko be•enni gita cholgri ong•gipa manderangna iandakgipa bosturangko on•na miksonganirang dongjachim indiba sorkari, cholrangko sandie gipinrangnaba apsan dakgipa bosturangko on•na jotton ka•gen ineba Chief Minister aganaha.

Meghalaya a•doko be•enni gita cholgri ong•gipa sak 44,000 manderangni bidingo janapatengon, batanggimin bilsirangoba iandakgipa manderangna sorkari dingtang dingtang program-rangko ong•ate, ma•manti bosturangko dakchake on•aha ine Chief Minister parakataha.

Rynthathiang-ara, Mawblei-oni bilsi 33 ong•gipa mande ong•achim aro ua be•enni gita cholgri ong•genchimoba, morarangko tarie badinggipa ong•achim.
Uni re•a doanio dakchakaniko on•na gita dingtangmancha una wheelchair-ko on•ahani gimin ua sorkariko mittelpilangskaaha.