Williamnagar, May 23: Williamnagar Government College-na gital rikenggipa building-ko bakan kulignok ine Mongolbar salo, Meghalaya a•dokni Education Minister Rakkam A Sangma, Williamnagar-ni Rongrenggre Government Higher Secondary School-ko nieani somoio parakataha.
Rongrenggre Govt Higher Secondary School-ko nina re•angani somoio ua Williamnagar Govt College-na gital rikenggipa building-koba niangjolaha aro ia gital building-ko rikanio ua chu•ongnikaniko parakatenba, ia gital building-ko bakan chalaignok ine parakatjolaha.
Rongrenggre Govt HS School-ko nina re•angani somoio uko East Garo Hills a•jani Deputy Commissioner, skulni principal aro skulo kam ka•enggiparang rimchaksoaha aro ia skulni neng•nikanirangko aro nangnikanirangko ma•sie ra•bana gita a•dokni Education Minister, skulni principal aro skulni skigiparang baksa agangrikangjolaha.
Meghalaya a•doko lekka porani kamrangko ka•anio chagrongna nangenggipa dingtang dingtang neng•nikanirangko namatna gita a•dokni Chief Minister Conrad K Sangma-ni dilanichi Meghalaya sorkari, rakbee kamrangko ka•enga ineba ua, skulni principal aro skigiparangna aganangaha.
Iani ja•mano ua, Williamnagar Govt College-ni principal aro college-ni skigiparangkoba gronge, uamangni nangnikanirangkoba knatime ra•baaha aro uamangni neng•nikanirangko ta•raken namatna gita jotton ka•gen ine Sangma, ku•rachakaniko on•angaha.
