Shillong, March 16: East Khasi Hills a•jani Mawryngkneng primary health centre (PHC)-ko community health centre (CHC)-ona ra•doatna gita Mongolbar salo a•dokni Chief Minister Conrad K Sangma, pangchakaniko songe on•angaha aro ia pangchakaniko songe on•anganio a•dokni Deputy Chief Minister Prestone Tynsong, Health & Family Welfare Minister AL Hek, Transport Minister Sniawbhalang Dhar aro gipin dilgiparangba dongpae bak ra•angaha.

Ia PHC-ko CHC-ona ra•doatna gita pangchakaniko songe on•angani somoio a•dokni Chief Minister jinmana aganprakangengon, a•dokni manderangna an•seng baljokaniko on•anian ia sorkarini mongsonggipa miksongani ong•a aro ia Mawryngkneng PHC-ko tang•doataniara manderangna nambata sanna banani cholrangko on•na miksonge ja•ku de•anian ong•enga ine parakangaha.

Mawryngkneng-osan ong•aigija a•dokni pilak biaprangon sanna banani cholrangko namdapatna gita sorkari kamko ka•enga ineba Chief Minister parakataha.
World Bank-ni dakchakanichi an•seng baljokani a•bao dal•begipa project-ko a•bachengatna sorkari manchisamsoenga ineba ia tom•anio Chief Minister parakataha.