Jowai, Sept 27: East Jaintia Hills-ni Mutong Tourism Promotion & Environment Development Society, West Jaintia Hills-ni Deputy Commissioner baksa nangrime Sombar salo Mutong song samba Moopun Waterfalls-o World Tourism Day-ko maniangaha.
Ia salko manianio, Jaintia Eastern College-ni Principal, P Nongtdu aro gipinrangni dongpaanio Society-ni padot H. Phawa-chi programko dakdilangaha jeon joltangni MLA aro a·dok sorkarini minister Pa Kyrmen Shylla mongsonggipa sokgipa ong·e bakko ra·angaha.
Tom·ao jinmana aganprakangengon, a·dokni skotong minister Pa Conrad Sangma, ia COVID sajinmani a·sel a·dokni Tourism namen su·pekaniko man·gen ine mikrakatange sajinmani komianga ja·man tourism a·basan tang·dopiltainaba man·gen ine agantaikuaha ine Pa Shylla u·iatangaha.
Gipin biaprangchini biap nina-rona re·bagiparangba joloni manderang sajinamni tikarangko su·tokahaoba songrebana aro biaprangko nina gita maming jajrengmanjawa ine aganangenba, Covid sajinmani tikarangko su·e ra·tokchina minister, songni manderangko mol·molangaha.
Iana agreba, a·jao Tourism-ko ama dipet tang·doatna gita a·dok sorkari bil donga kakket jotton ka·gen ineba minister, tom·bagiparangna ka·dongataniko on·angjolaha.
Indake ong·engon, salniaona kingking ia manianiko ong·atanganio, PluggingRun, Marathon, Trekking aro chi jrosusaaniko man·chape dingtang dingtang dakgipa susaatanirangkoba ong·atangjolaha.
