Tura, May 11: Zikzak block-o PMGSY ramako taria matchotgija galchipe donahani gimin talbate ma•sie ra•na gita Garoland State Movement Committee (GSMC) Zikzak unit, RTI ka•aha ine kobor on•aha.
GSMC Zikzak unit-oni koborko on•atani gitade, ia ramara Domapara gita Aningpara-oni Katuli-ona dakanggipa kilometer 12-ni PMGSY rama ong•achim aro ia ramako ru•uta bilsirangonin taria matchotgija galchipahani gimin GSMC-ni membor-rang, iani bidingo talbate ma•sie ra•na RTI ka•aha.
Ia ramako re•anggipa bilsirangon matchotgen ine ramako tarigipa contractor-rang ku•rachakanirangko on•ahachim ine janapatengon, ian songni nokni manderangko cha•bokna jotton ka•aniko mesokanisa ong•enga ine GSMC Zikzak unit-ni general secretary Dichon Ch Marak parakataha.
