Tura, December 8 : Rangsakona Constituency-ni MLA, Subir M Marak, “100-Days TB Elimination Campaign (Ni-kshay Shivir) 2024” aro “Meghalaya Comprehensive TB Care”-ko West Garo Hills, Tura SMELC-ni conference hall-o a•bachengate on•angaha. “Taking Care of Everyone : TB Free Meghalaya – TB Care,” ingipa katta bichongko done ong•atgipa ia program-o Dr. Riksilchi M Sangma, Dr. Jakrambal A Sangma aro Dr. Supurna Ray Hajong baksana gipin official-rangba dongpae bak ra•angpaaha.
Saanirangko ta•rake rim•a man•e, TB saaniko porikka ka•e nianiko ru•utatgija aro nambatgipa sanna bannaniko on•anichi tuberculosis saaniko bon•atna dakgrikaniko ta•rakbatatanian ia campaign-ni miksongani ong•a.
DTO-ni in-charge, Dr. Riksilchi M Sangma, ia campaign-ni ning•o mongsongbate kenchakna nangbatgipa dolrangna jekai, TB sagipa mande baksa apsan dongbringipa, ta•makku ringgipa, chu ringgipa, HIV sagipa, diabetes sagipa, bilsi 60-na batgipa aro chu•onga gita cha•a ringanirangko man•gijagiparangna, X-ray-rang aro expert testing ba porikka ka•e nianio name u•igiparangchi name nianirangko dakanggen. Iana agreba pilak manderangkon, TB saani chinrang dongama dongjawa uarangko nianirangko dakangan baksana TB saana krae nikenggipa manderangkoba porikka ka•e nianirangko dakanggen.
Ia campaign-ko ong•atengon, porikka ka•e niani aro samrangko sakantinan indin suale on•anggen. India a•song gimikoniko sak 20,000 TB sagiparangko man•dapan baksana 30 ba 70 %-ni gita TB saaniko ta•rake rim•na miksonganio ia campaign-ko ong•atenga.
Dr. Sangma, “Nikshay Mitra”-ni bidingo jinmana u•iate on•angaha. Ia Nikshay Mitra-o on•gilaniko dakgipa manderang TB sagiparangna be•enna namgniko on•gipa cha•a ringanirang, sannanirang baksana gisikni gita bilake dongna dakchakanikoba on•anggen.
Mongsonggipa sokgipa, Rangsakona Constituency-ni MLA Subir M Marak, Nikshay Mitra-o bakrimenba TB sagiparangna dakchakpaaniko on•a didiengon, chonchongipa chi tottakrang sagalko ong•atna dakchaka ine aganenba, TB saaniko bon•atna gita jinmani dakchakpaaniko on•ani gamchatani gimin ua gisiko nangbate aganangaha. Chu•onga gita cha•a ringani dongjani a•sel TB saaniko man•rongbata inenba ua be•enna namgniko on•gipa cha•ani ringanirangko an•ching cha•na nangchongmota ineba ua aganangaha.
NPYF-ni National Secretary, Dabo Marak, TB saaoni nampilna gita namnamgipa cha•a ringaniko nangchongmotani gimin TB sagiparangna be•enna namgniko on•gipa cha•ani ringani aro tangka paisarangko on•e dakchakni bidingo aganangskaaha.
District Medical & Health Officer, Dr. Jakrimbal A Sangma, ia campaign-na dakchakniko on•china jinmao didiangengon, uamangni ku•mong nangrime dakchakaniko on•achisa chu•sokna gita man•gen ineba aganangkuaha.
Ia program-ko ong•atanio, TB saa nampilgipa aro Nikshay Mitra-rangna uamangni on•gilpaanina mande ra•pilskaani gita certificate-rangko on•angaha. Indake ong•engon, Subir Marak, 100-Day Campaign-ko a•bachengate on•anangan baksana Nikshay Vahan ba TB sagiparangko sannanio jakkalna gita garikoba jinmana oprake on•angjolaha. Ia program-ko Dr. Supurna Ray Hajong-ni mitelpilani kattarangchi matchotataha.
Na·simang ia video-koba nina man·gen:
Na·simang iakoba poraina man·gen: Salgittamna Tura-o ong·atanggipa NERM matchotanga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
