Itanagar, June 17: India a·songara a·gilsakni tom·tomani pamong ong·a, indiba maichiba chadrapchenganiko dakode uko warachakna gita chu·gimik bil donga ine a·songni Defence Minister Pa Rajnath Singh, Brisitbar salo parakataha.
Salgro-salaram a·dok Arunachal Pradesh-o tarigipa paktangtangchini gari bolgni re·sretgrikna man·gipa km 20 mang bakrogipa Kimin-Potin ramako aro Border Roads Organisation (BRO)ni tariatgipa ge·gipin nangchongmotgipa rama ge 11-ko a·songna pakwate on·angao, sima-ari jolrango tom·tom aro name donganiko jechiba golmal ka·a ong·ode namjabegipa obostaona sokgen ine minister parakataha.
A·songna mongsong nangchongmotgipa ge 12 ramarang, songsa-songgipinona re·rurana namgnikosan on·aijawa, indiba a·songgipin baksa sima-ari kachapgipao donge nitimenggipa sipai dolrangna gong·rakbate re·rurana gita namgipa cholba ong·gen, ine defence minister aganaha.
A·songni diltugipa sima-ari jolrangchina rama-jal·langrangko tarie on·anina aro a·songna nangchongmotgipa ge·gipin ramarangko tarie on·anina BRO-ko dingtangmancha mittelpilatengon, Defence Minister ua ge 12 gital ramarangko intenet gita mikkang nikgrike tom·angao a·songna pakwatangaha.
Uni aganangkuani gita, a·songni mongsonggipa kamo bak-rengsi ong·atna a·songni pilak biaprangko nangdimatna sorkarini nangnikenganiara namroro-silroroaniko aro tang·doaniko apsangrik on·na miksongani ong·a.
Indake ong·engon, a·songna pakwatanggipa ge 12 ramarangoni ge·sako Ladakh-ni Union Territory-o tariaha, ge·sako Jammu aro Kashmir-ni Union Territory-o aro bangkirangko Arunachal Pradesh a·doko tariaha.
Ua ramarangko oprake on·angao, Assam-ni skotong minister Pa Himanta Biswa Sarma, Arunachal Pradesh-ni skotong minister Pa Pema Khandu, Minister of State (Independent Charge) for Youth Affairs aro Sports-ni minister Pa Kiren Rijiju aro Defence Staff-ni Chief, General Bipin Rawat aro BRO-ni aro Army-ni a·gipi official-rang gimikba dongpatokaha.
Internet gita mikkang nikgrike tom·anganio, Minister of State (Independent Charge) for Development of North Eastern Region aro Minister of State, PMO, Dr Jitendra Singh-ba gipin niksenggiparang baksa bakko ra·angpaaha.
