Shillong, Nov 06: Re·baenggipa 2023 bilsio a·doko General Election ong·na mikkang-mikkang, 17-North Shillong constituency-ni sak 370 na baten BJP dolni dilgiparang aroba chakpaenggiparang mija Sonibar salo National People’s Party (NPP)-o napangtokaha.
Attamchibara, Lawmali-ni Dorbar Hall-o tom·aniko ong·atanggipao, 17-North Shillong-ni NPP candidate Pa Ransom Sutnga, Shillong City-ni NPP dolni padot, Pa Lamphang Kharmujai aro dolni gipin officialrang, North Shillong-ni BJP-ni dilgipa Pa Alwyn Lyngdoh baksana gipinrangko dolona rimchaksotokaha.
Unomiting tom·anio, Pa Sutnga, jinmana aganangengon, North Shillong-ni sak 100 batpile AITC-ni manderangba ru·utgijan NPP dolo napetoknasienga ine u·iatangaha.
Dilgipani kamko watani bidingo Pa Alwyn Lyngdoh-ni kobor ra·timgiparangna aganangani gitade, North Shillong constituency-ni BJP dolo ma·sichakgrikani dongja ine parakatan baksa, BJP dolni tikitchi susana am·enggipa Pa MH Kharkrang aro Pa M Kharsyntiew, iamangoniko saksakoba ua aro unbaksana sak 370 gipinrang ra·chakna man·jani gimino doloni ong·kate NPP-ona napena gita draatako man·aha ineba ua agandapataha.
