Shillong, May 2: 1st Battalion Meghalaya Police (MLP)-ni Golden Jubilee-ko Sombar salo, Shillong songjinmani Mawiong-o maniangaha aro ia golden jubilee-ko manianio, Meghalaya a•dokni Home Minister Lahkmen Rymbui, mongsonggipa sokgipa ong•e bakko ra•angaha.
Ia manianio gimik doldok sipairang, Parade-o bakko ra•angaha aro ia doldok sipairangoni skanggipa dolko ABSI Favourite Wanniang, gnigipa dolko ABSI Borkom Basaiawmoit, gittamgipako ABSI Anderning Nongrum, brigipako ABSI Sangsang Ch Sangma, bongagipako WP ABSI Mosetha M Sangma aro dokgipa dolko WP ABSI Wansuk Myrthong dilangaha.
1st Battalion MLP-ni golden jubilee-ko manianio a•dokni Home Minister, jinmana aganprakangengon, a•doko songdongenggipa manderangko chel•chakna gita rakbee kamrangko ka•engani gimin sipairangko mittelpilangaha aro kamtangtangko ka•anio janggitangtangko gimaatna nanggipa sipairangnaba mande ra•pilskaaniko dakangaha.
Janggi tangani chol dakesan chanchiaigija an•tangtangko a•songna on•kanggiparang ong•e police-ni kamko ka•china gitaba ua chadamberangko didiangaha.
