Shillong, Sep 23: 2 Meghalaya Battalion NCC-ni sianggipa sipai Rifleman Dil Bahadur Thapa sagiko mande ra•pilskaani chin gita a•songni Prime Minister Narendra Modi-ni soi ka•gipa memento-ko Sukrobar salo, 2 Meghalaya Battalion NCC-ni official-rang, uni jikgipa Parbati Thapa-na on•ataha.
India a•songni jakgitelaniko man•aoni bilsi 75 gapaniko maniani bak gita a•songna on•kange sianggipa pilak sipairangnan a•songni Prime Minister Narendra Modi mande ra•pilskaaniko dakenga aro uandaken 2 Meghalaya Battalion NCC-ni Rifleman Dil Bahadur Thapa sagikoba mande ra•pilskaani chin gita Prime Minister-ni soi ka•gipa memento-ko uni jikgipana on•ataha.
Rifleman Dil Bahadur Thapa, 1997 bilsini February 10 tariko 2 Meghalaya Battalion NCC-o biming segatahachim aro uko Jammu Kashmir a•dokni Batalik Sector-o donggipa 4/8 GR-o donatahachim.
2005 bilsini June 8 tariko ua, unit-tangna cha•ani bosturangko salna gita Supply Point-ona gari sale re•angengmitingo rasong gribee uni gari a•sel ong•aha aro uni gari Sindhu chibimaona ga•aksruange ua siangna gita nangahachim.
Rifleman Thapa sagiko mande ra•pilskaani chin gita ia salo, 2 Meghalaya Battalion NCC-ni Subedar Major Keshab Paudel, dingtangmancha National War memorial memento-ko uni jikgipa Parbati Thapa-na on•angaha.
