Guwahati, Sept 27: Batanggimin 2008 bilsio dingtang dingtang biapo bom gopretataniko dakangani mamlao rim·a man·gipa sak 6 gipinrang baksana NDFB-R bobil dolni skotong dilgipa Ranjan Daimari-ko janggi tanga gimikna sasti on·gniko ra·rike Gauhati HC, Mongolbar salo rai on·angaha.
Iana skang, janggi tanga gimikna sasti on·ako man·gipa sak 3 gipinrangkoba dos grianio watahachim. Sak 4 gipinrangoni saksako UAPA-ni ning·o sasti on·anikoba wataha. Indake ong·engon, bobil dolni dilgipa Daimari, da·o Chirang-o noktang gita dakpilgipa VVIP cell ba pattok ning·ao dongenga.
Gopretatani mamlao, batanggimin 2019 bilsio CBI-ni kacharichi hukumko on·angani kosako ra·bienba Daimary aro gipinrang, Gauhati High Court-ona re·angaha. Indake high court, Mongolbar salo ua mamlao uamangni raiko on·angsksaha.
Janapjolna gita, National Democratic Front of Bodoland (NDFB) bobil dolni batanggimin 2008 bilsini October 30 tariko dingtang dingtang biapo bomrangko gopretatgipao komibeoba sak 88 dos gri manderang so·ota man·tokahachim. Ua somoio, joljol bom gopretataniko Guwahati, Barpeta Road, Kokrajhar aro Bongaigaon-o dakangaha aro ian Assam-ko namjabatgipa bewalo bobil dolni chadrapaniba ong·jolaha.
