Shillong, March 10: 2021-2022 bilsina Meghalaya a•doko tarigipa Budget-ko da•al Budbar salni bako, Meghalaya a•dokni Chief Minister Conrad K Sangma, jinmana parakataha. Ia bilsini budget-o a•dok sorkari, kam ka•giparangko namdapatna, rama jal•langrangko namdapatna, bading chiwalaniko tang•doatna, kangal cha•asianiko bon•atna aro tourism baksana kal•susaanirangko namdapatna miksonganio budget-ko tariangaha.
Chief Minister-ni parakatani gitade, chu•gimik receipt-na gong kror 17,509-ko, jeonin revenue receipt-na gong kror 15,232-ko sorkari chamaha. Gong kror 2,247 ong•gipa ra•sroanirangko changale chu•gimik receipt-ko kror 2,277-na chamaha ineba ua parakataha.
Korosni bidingo janapatengon, chu•gimikna korosna gong kror 17,603-ko chamaha, jeonin revenue expenditure-na gong kror 13,956 aro capital expenditure-na gong kror 3,647-ko chamaha ine Chief Minister parakataha.
Chief Minister-ni u•iatani gitade, ia 2021-22 bilsini Budget-o mongsonggipa tangka paisa chamaniranga, PWD (R)-na gong kror 1626, C&RD-na gong kror 1220, Education-na kror 2432, Health-na gong kror 1271, PHE-na kror 1181, Sports-na kror 185, Social Welfare-na gong kror 708, Water Resources-na kror 162, Agri aro Horti-na gong kror 382, Urban Affairs-na gong kror 293, Arts & Culture-na gong kror 105, Soil & Water Conservation-na gong kror 208, Tourism-na gong kror 82, Forest aro Wildlife-na gong kror 218, Commerce & Industries-na gong kror 118 ong•enga.
