Shillong, Jan 6: Meghalaya a•dokni bilsi 50 gapaniko manina tarisamsoengahaon, da•o ong•enggipa Meghalaya a•dokni Meghalaya Democratic Alliance (MDA) sorkari, matchotgija dongenggipa kamrangko ta•raken matchotatna miksongenga.
United Democratic Party (UDP)-ni dilgipa aro a•dokni Cabinet Minister Lahkmen Rymbui-ni parakatani gitade, ia 2021 bilsian MDA sorkarina mongsonggipa bilsi ong•gen.
“Ia bilsiara chingna mongsonggipa ong•enga maina chinga bang•bata project-rangkon 2022 bilsini bon•na skangan matchotatna nangnikenga,” ine Rymbui, kobor ra•timgiparangna aganaha.
MDA sorkariko rikchengaoni da•o bilsi gittam gapna siengaha aro Assembly election-na da•o bilsignimangsan dongaiahani gimin sorkari, matchotkugijagipa kamrangko matchotatna nangengahachim.
Indake ong•engon, ia sorkariko a•dokni manderangsa seokahani gimin ian ia sorkarina mongsonggipa bilsi ong•gen ine a•dokni Home Minister parakataha.
Meghalaya a•dokni Home Minister Lahkmen Rymbui, Education, District Council Affairs (DCA) aro Border Area Development (BAD) department-rangkoba jako ra•engachim ine nikna man•a.
Sorkarini miksonganirangko chu•sokgipa ong•atna gita name chanchie ja•ku de•aniko nangchongmota ine janapatengon, “Education department-ni gita chingo Rongjeng aro Patharkhmah model degree college-rang donga aro ia college-rango mai dakgipa course-rangko on•gen aro maikai kamrangko nakatatgen, chinga name chanchirimchengna nangenga,” ine Rymbui parakataha.
Shillong engineering college-ko ia bilsini December jao matchotna ka•dongenga ineba Education Minister parakataha. “Ia college-ko 2022 bilsioni a•bachengatna man•na gita kamrangko nakatatani aro course-rangko on•ani bidingo chinga name chanchina nangenga,” ine ua aganaha.
Minister-ni aganani gitade, Garo Hills-oba architecture college-ko da•o rikengaha aro unbaksana Mawphlang aro Mahendraganj-oba science college-rangko sorkari rikengaha.
“2022 bilsiara Meghalaya a•dokni bilsi 50 gapani bilsi ong•engani gimin ia pilak kamrangkon chinga 2022 bilsini gisepon matchotatna gita chinga name chanchie kamrangko ka•na nangenga,” ine Rymbui aganaha.
Home (Police) department-ni gimin janapatskaengon, police-rangko Meghalaya a•dok ning•osan ong•aigija sima arirangoba bilakbatatna man•na gita department-ko taridapna nangenga ine Minister parakataha.
“Tangka paisani gita chinga neng•nikanirangko man•na nangenga ine chinga ma•sia indiba tangka paisani bang•e kam ka•gija chinga a•dokna nambate dangdike on•na ia department-ko taridapna nangenga,” ine Rymbui aganenba, apsan somoion sorkari, Border area development department-koba namdapatna jotton ka•gen ine parakataha.
