Tura, Feb 26: Meghalaya Legislative Assembly-ni sak 60 MLA-rangko seokna gita Sombar salo, Meghalaya a·dokni manderang, pu·onna gita siengahaon, ‘Ia chang a·dok sorkariko sawa rikgen?’ ine sing·anian a·doko songdongenggipa mande sakprakni gisiko sing·ani ong·enga.
Ia 2023 bilsini Meghalaya Assembly election-ko ong·atna gita Election Commission of India (ECI)-ni parakata intalan, dingtang dingtang political dolrang, bilakbee kamrangko ka·na a·bachengtokaha aro jagnina bilakbee campaign-rangko ka·ani Sonibar attamo matchotangaha.
Election-na kamrangko ka·chichaanio dolsa dolgipinni kosako matnanggrikanirang, dolsaoni dolgipinona katanirang aro uandake badiaba badiaba biaprangode dolsa dolgipin baksa dinggrikanirangkoba nikna man·angaha.
2018 bilsini Meghalaya Assembly election-ko niatpilgenchimode, ua bilsio NPP dam 19 seat-rangko, Congress dam 21-ko, BJP dam 2-ko aro UDP dam 6-ko seat-rangko chena man·ahachim. Ua somoio Congress dol, dam 21 seat-rangko chena man·ahaoba gipin dolrangni bakrimaniko man·jae sorkariko rikna chol ong·jaha aro ua bilsio National People’s Party (NPP) dam 19 seat-rangko chee, UDP, BJP aro gipin dolrang baksa bakrime sorkariko rikskaaha.
Ia bilsini Assembly election-ko niatskagenchimode, ia chango Congress aro BJP dolgnian gimik dam 60 seat-rango susaenga aro NPP-de dam 57 seat-rango aro TMC-ba dam 56 seat-rango susaskaenga ine nikna man·enga.
Batanggimin bilsi bongana NPP, BJP, UDP aro gipin dolrang baksa bakrime sorkariko chalaiahaoba da·o pilak dolrangan doltangtangari susatokenga aro uandaken ia election-na campaign-rangko ka·soanio BJP aro pilak dolrangan NPP-ko nisan ka·e matnanganirangko daktokahachim.
TMC-de Meghalaya a·doko gital dol ong·enga indiba a·dokni gitcham chief minister aro opposition dolni dilgipa Mukul Sangma, gipin sak 12 MLA-rang baksa Congress doloni ong·kate TMC-o napskaahani gimin da·o bilake susaenggipa dolrangoni dolsa ong·enga.
Congress dolni MLA-rang pilakan wate kattokahani gimin da·o ia dol bilakbataina gita ia election-o gital dake a·bachengtaina nangao ga·akskaengaha aro uandaken ia changoba a·dok gimikni dam 60 seat-rangon susataienga.
BJP-ba 2018 bilsio damgni seat-rangkosan cherikaiahachim indiba ia changode bang·bate seat-rangko chena miksonge a·dok gimikni dam 60 seat-rangon susaenga.
Pilak dolrangan ia election-o bang·bate seat-rangko chena ka·dongtokengani gimin sorkariko rikna gitaba a·kangtokenga indiba Sombar salo, a·dokni manderangsa uamangni rasirangkode mesokskana siengaha.
Meghalaya Assembly election-ni result-ko March-ni 2 tariko parakna sienga aro unsalode a·dokni manderang, sawa ia chang sorkariko rikgen, ukoba aganna man·gnok.
