Shillong, Jan 16: Ia 2025 bilsio chu·sokatna sienggipa kamrangko Meghalaya a·dokni Chief Minister Conrad K Sangma mesoke on·angaha aro ia kamrangoni mongsonggiparangara, Umroi airport-ko dal·batatani, medical college-rangko kuliani, Mawdiangdiang-o government secretariat-ko rikani aro mongsonggipa ramarangko tarianian ong·enga.
Umroi airport-ko dal·batatani bidingo janapatengon, ia airport-oni dal·dalgipa sildorengrangko ta·raken watanian uni mongsonggipa daito ong·enga aro iani bidingo ua Delhi-onaba re·ange, ma·mong sorkari baksa agangrikna sienga ine Chief Minister parakataha.
Umroi airport-ko dal·batatna krenganio ma·mong sorkariba pilak nanga dakchakanirangko on·engani gimin ia airport-oni bakan dal·dalgipa sildorengrangko watna ka·dongenga ineba ua aganaha.
Shillong aro Tura-ni gisepo sildorengko bilruraatna gita sorkari rakbee kamko ka·enga ineba Chief Minister parakataha.
Shillong aro Tura medical college-rangko man·a dipet ia bilsini gisepon kulina miksongenga ine janapatskaengon, Shillong medical college-ode ia 2025 bilsini September jaon class-rangko a·bachengna man·naba gnang aro Tura medical college-koba man·a dipet ta·raken matchotatna sorkari krengenga ine Chief Minister aganaha.
Tura medical college-ko rikani bidingo talatangengon, kamrang bewalan ta·rakengoba dingtang dingtang neng·nikanirangko chagrongna nangenga indiba man·a dipet kamrangko ta·raken matchotatna sorkari jotton ka·enga ine Sangma aganaha.
Mawdiangdiang-o gital secretariat-ko rikani bidingo janapatskaengon, re·baenggipa January 21 tariko, Meghalaya Day-ko maniani salon Mawdiangdiang-o gital secretariat-ko rikna pangchakaniko songgnok ine Chief Minister parakataha. Mitam office-rangko ia biapona apjitbasona man·na gita bilsignini gisepon mitam block-rangkode ia biapo matchotna ka·dongenga ineba ua aganaha.
Tura, Jowai aro Pynursla-o bakan Mini Secretariat-ko rikgen ineba Chief Minister parakataha.
A·dokni mongsonggipa ramarangko tariani bidingo janapatskaengon, Umiam aro Ratacherra gita Assam-ona tariangna sienggipa ramana ua namen kusi ong·soenga ine Chief Minister parakataha.
Chief Minister-ni aganani gitade, ian gong crore 24,000-ni project ong·a aro ian Meghalaya a·doko aro salgro salaram jol gimikoba dal·batsranggipa road project ong·naba gnang.
Shillong songjinmao ramarangni apchangket ong·aniko namatna gita sorkari, dingtang ramarangko tarina miksongenga ineba Chief Minister parakataha.
Na·simang ia video-koba nina man·gen:
Na·simang iakoba poraina man·gen: Forensic analysis-na tangka ra•aniko namnike Cabinet ra•chaka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
