Shillong, Aug 21: West Jaintia District Sports Association-ni ong·atanggipa gnigipa Division Football Tournament, ba jekon bongagipa Debo Shullai Memorial Trophy 2022 ineba mingachim, ia kal·susaaniko Sonibar salo, Mookyndur Sports Club cheangaha.
Ia football tournament-ni bon·kamgipa kal·susaaniko Sonibar salo Mookyndur SC aro Khliehiongriang SC-ni gisepo Jowai-ni Kiang Nangbah Stadium-o kal·susaangaha aro uandaken ia kal·susaanio Mookyndur SC, Khliehiongriang SC-ko goal 1 chipe, ia kal·susaanio chegipa ong·aha.
Mookyndur SC-na goal sako Nehlang Phawa, kal·susaani minute 4 ong·engpition chipe on·aha.
Ia kal·susaanio chegipa ong·e Mookyndur SC, gong 24,000 tangkako boksis dake man·angaha aro Khliehiongriang SC-ba gnigipa biapko man·rikahani gimin gong 12,000 tangkako boksis dake man·aha.
Ia kal·susaa gimiko Best Goal Keeper ba nambatgipa goal keeper-ni boksisko Khliehiongriang SC-ni Rimi Dkhar-na, Top Scorer ba goal bang·bate chipani boksisko Mookyndur SC-ni Jomsing Pariat aro Iawmulong Nartiang dolni Ebanskhem Nongtder-na on·angskaaha.
Man of the Match award-ko Mookyndur SC-ni Nehlang Phawa-na aro Player of the Tournament award-koba Mookyndur SC-ni P Suting-na on·angskaaha.
Ia bon·kamgipa kal·susaanio Meghalaya a·dokni Arts & Culture Minister Sanbor Shullai, mongsonggipa sokgipa ong·e bakko ra·angaha.
