Shillong, August 23: Shillong songjinmani TB Hospital jolni Mawbah biapo ge• 342 Harijaan nokdangrangko songdongna on•na Meghalaya Sorkarini chanchianirangko, West Shillong elekani, Congress doloniko ra•gala man•gipa MLA Mohendro Rapsang namnikgijaniko parakaha.
MLA Rapsang-an Harijaan nokdangrangko ma•chakna biap on•na ja•ku de•anio jak donga aro uan elekatango election pu•anirango bang•bate man•na miksonge dakenga ine UDP MDC Paul Lyngdoh-ni matnanganirangko kakket ong•ja ineba, MLA Rapsang talataha.
“Anga Cabinet Minister ong•ja ine skanggipa Paul Lyngdoh ma•sichengna nanga aro sorkarini kamrango bakrimaniko on•kamaigipaba ong•paja, uni gimin Harijaan nokdangrangko ua biapo ma•chakna on•aniba sorkarini kamsan ong•aia, angade chanchianirango bak man•gipa ong•ja,” ine MLA Rapsang agandapaha.
Ua Dorbar Shnong baksa bakrimpae, Harijaan nokdangrangko Thew Ïewmawlong biaponiko West Shillong Constituency-ni ning•o ga•akgipa Mawbah jolona sorkarini songdongna rimnapani kamrangko raken jegala ine MLA Rapsang parakataha.
Uandake West Shillong Constituency-ni ning•o election susataianio chegipa ong•taigenchimode ia obostarangan uni kam ka•gnirangoni skanggipa jako ra•chenggipa ong•anggen ine Rapsang agandapaha.
