Shillong, May 14: Adita salrangna skang eleksinko ja·manchake ong·atanggipa Sohiong assembly seat-ko, Khasi Hills-ni mongsonggipa a·joltangni political dol, United Democratic Party (UDP) cheaha, aro iachi uamang da·o sak 60 membor gnanggipa Meghalaya Legislative Assembly-o ge 12 seat-rangko man·aha.
Sohiong seat-na mija Butbar salo pu·onatgipao, pu·onanga gimik ge 32161 vote-rangoniko, postal ballot-rangko chane, UDP-ni candidate Pa Synshar Kupar Roy Lyngdoh Thabah, chu·gimik 16679 vote-rangko man·enba ia eleksino susarimgipa gipin candidate-rangni kosako ge 3422 vote-rangchi altuae cheangaha. Indake ong·engon, MDA-II sorkariko rikdilenggipa National People’s Party (NPP)-ni candidate aro jolni MLA ong·enggipa Pa Samlin Malngiang, chu·gimik ge 13,257 vote-rangkosan man·eming gnigipasa ong·aiaha.
Sakgipin Congress dolni candidate S. Osborne Khajana, vote man·anirango namen chel·tanggrike chu·gimik ge 1762 vote-rangchi gittimgipa biapkosan man·skaaiaha.
Sohiong assembly seat-na pu·onataniko re·anggipa May -ni 10 tariko ja·manchake ong·atangna nanganiara, February 20 tariko a·dokni home minister gitcham aro UDP-ni candidate ong·e susanasigipa Pa HDR Lyngdoh sagini tanggitik a·gilsakko wate re·anganichi ua constituency-o eleksinko ra·doatna nangao ga·akahachim.
Ia Sohiong seat-na UDP-ni candidate-ko seoktaienba susaatgipa Pa Synshar Kupar Roy Lyngdoh Thabah-ra, Pa HDR Lyngdoh sagini gritang ong·skaa.
