Shillong, Sept 27: Golmal gnanggipa Meghalaya aro Assam-ni sima-arirangko gnigipa gadango namgrikataniko daknasienggipana Karbi aro Nepali jatrangni jingjengatenganina dingtangmancha nirokataniko nangnike, Block II-ni Synjuk ki Rangbah Shnong Border Areas-na seokako man·gipa dilgiparang, Mongolbar salo Ri-Bhoi a·jani Deputy Commissioner-ko gronge una memorandum-ko on·angaha.
Gnigipa gadango namgrikataniko daknasienggipa a·jani ning·o mongsongbate ia mamlako ra·e je dolnaba jingjengatani programrangko dakna on·jawa ine a·dok damgnini sorkarirang tik ka·angahaoba, sima jolo songdonggipa Nepali aro Karbi jatrang tik ka·anggiminko pe·e dingtang dingtang jingjengatanirangko dakatengachim jeni kosakon Assam, West Karbi Anglong-ni district administration maming ja·kuko de·ata dongja ine u·iataha.
A·dok damgnini sima-ariko namgrikatna mikkang-mikkang, jingjengataniko dakna beng·ate ge·gni sorkarirangni tik ka·anggiminko pe·anina ia mamlako nirokatchina gita Block II-ni Synjuk ki Rangbah Shnong Border Areas-ni dilgiparang DC-ko grongangani somoio uo mol·molangaha.
Synjuk ki Rangbah Shnong Border Areas-ni padot, Blikstar Sohtun-ni u·iatani gita, gnigipa gadango namgrikataniko daknasienggipa sima-ari jolni Block II a·jani ning·o ga·akgipa Khasi jatrang ia mamlako ra·e mamingba jingjengataniko da·odipet dakatkujanichi a·dok damgnini tik ka·anggiminko mamingchiba pe·a dongja.
West Karbi Anglong-ni district administration-ni maming ja·kuko de·ata gri Block II-ni ning·o ga·akgipa Assam-chipakni manderangni iandake jingjengatanirangna Khasi jatnaba namen chanchina nangani ong·a ineba ua janapatkuaha.
Iani gisepon, Synjuk ki Rangbah Shnong Border areas-ni dilgiparang uamangni memorandum-o West Karbi Anglong baksa apsan ia mamlako nirokatchina aro gong·rake ja·kuko de·atchina gita didianiko on·angan baksa, uamangni mol·molaniko knachakjaode Ri-Bhoi district-ni Block II-o songdongenggiparang raken jingjengataniko dakangskagen ineba Sohtun, mikrakataniko on·angjolaha.
