Shillong, Feb 16: Bang·gija salrangna skang mangmang a·dok gimikchin bijoli kimitaniko a·bachengatani ru·utgijan, Meghalaya a·dok gimiko sal aro walo chu·gimik konta-sni gape bijoli kimitenganiko konta 24-ni ja·mande chu·gimikkon ra·galgnok ine a·dokni skotong minister Pa Conrad K Sangma da·al Mongolbar attamchibara parakataha.
Iachi, a·dokni manderang da·ode bijoliko kimitani a·sel neng·nikaniko chagrongangna gita nangjawaha ine nikatna man·enga.
Indake ong·engon, bijolirangko jakkalanio kajina gamkugija dongenggipa gimikkon man·adipet matchote gamtokenba a·doko bijolini a·bako tangatpilna gita sorkarina cholrangko on·china gita a·dokni skotong minister Pa Conrad Sangma, jinmana didianiko on·angjolaha.
Dingtang dingtang ja·kurangko de·chakate, amadipet a·doko bijolini a·bako namdapatna aro mangrakdapatna gita sorkari jotton ka·enga ineba ua agandapaha.
