Shillong, Oct 26: A·dokoni ge·gni Hydro Electric Project-rangoniko bijoli bikotna gita Meghalaya sorkari, Mongolbar salo North Eastern Electric Power Corporation Limited (NEEPCO) baksa songgigrikaniko dake soi ka·grikangaha.
Iani bidingo dakchakgipa skotong minister aro power department-ni minister-ba on·enggipa Pa Prestone Tynsong-ni u·iatangani gitade, Umiam Stage 1, Stage 2 aro Stage 3 iarangoniko 235 MW bijoliko bikotna gita NEEPCO baksa mnisalo soi ka·grikaha.
Unbaksana, 50 MW aro 100 MW naba attamo soi ka·grikaha ine u·iatangkuenba, Umiam Stage 3 oniko bijoli bikotchakatani kamba bon·kamgipa gadangona sokaha aro NEEPCO iako bakbakan a·bachengatna gita ka·dongsoenga ineba ua u·iatjolaha.
Bijolina songgigrikaniko dakangani gimin janapatengon, a·doko bijolioniko man·gniba 50 % ni gita namen komiengani gimino a·dok sorkarini soi ka·grikaniara namen nangchongmotgipa ong·a unbaksana, jensomoio ia 235 MW project-ni kamko matchotahaon indin watenggipa bijolina 13 % de namgniko ra·badapna gita man·gen ine talatanga baksana, ia songgigrikaniko dakengon iako be·en pil·atchina gitaba NEEPCO-ni officialrang-koba Pa Prestone Tynsong mol·molangjolaha.
