Tura, April 28: A·songni Prime Minister Pa Narendra Modi, Sukrobar salo, East Garo Hillls-ni skotong Williamnagar-o 100 watt FM Radio Transmitter-ko a·jani Deputy Commissioner Vibhor Aggarwal, Tura-ni AIR Station Director, Pa Ferdinand D Marak aro gipin niksenggipa manderangni dongpaanio video conference gita a·bachengate on·angaha.

FM transmitter-ko a·bachengate on·angengon, a·songni Prime minister, salgro-salaram a·jolo FM radio transmitter-rangko apalatanichi chasong damberangna bang·en namgnirangko on·gen aro India a·song gimiko ge 91 transmitter-rangko a·bachengate on·anio a·songni kror 2 manderang da·ode FM radio-ko suk ong·e knatimna gita man·gnok ine aganangan baksa, manderangona nangchongmotgipa ma·sie ra·anirangko sokatanio dakchakanirangko on·na gita FM transmitter aro digitial connectivity-rang gita dingtang dingtang koborko watanirangko baridapatgen ineba Prime minister aganangaha.

FM radio-ko a·bachengate on·ao dongpagipa Tura-ni All India Radio (AIR) Station-ni Director, Pa Ferdinand D Marak, FM transmitter-ko a·jao a·bachengate on·aniba Williamnagar-o songdongengipa manderangni nangnikanian ong·a aro 400 square kilometer-rangona kingkingan FM radio-ko manderang knatimna gita man·gen ine parakataha.