New Delhi, Sept 19: Sikh jatni palo dingtangmancha seoke watata man·giparang, Sombar salo a·songni Prime Minister Pa Narendra Modi-ko New Delhi-o donggipa uni noktango grongangtokaha jeon Sikh delegation, PM-na kotipko ganate aro Siropa-ko on·enba una dal·e mande ra·aniko dakanga baksa uni bakroe janggi tanggnina aro an·seng-baljoke donganina jatni dakbewal gita ‘ardas’ koba dakangjolaha.
A·songoni Sikh jatko mande ra·an baksa uamangni namgnina dangdike on·ahani gimin kusi ong·enba Sikh delegation, a·songni Prime Minister-ko dingtangmancha mittelpilangengon, December 26 tarikko “Veer Baal Divas” ine parakatani baksa, Kartarpur Sahib Corridor-ko oe on·pilani, gurudwara-o chalaigipa Sikh toromko ra·giparangna cha·aniko indin on·na gita jakkalenggipa babilsi (langar)o nanganirangna GST-ko ra·galani aro Sikh toromni rongtalgipa ki·tapko seskagimin Guru Granth Sahib-ko Afghanistan a·songchiniko India-ona name sokatbana man·na gita kam ka·ataniko ba ugita minggipinrango Prime Minister-ni dakchakanirangko on·aniko uamang gisik ra·atpilangaha.
Iarangna agreba Sikh delegation, Delhi-ni Gurudwara Shri Bala Sahib Ji-ni namgipa ku·pattiataniko PM-na on·anga baksa prasad-koba on·angjolaha. Prime Minister-ni atchiani salko gisik ra·ani gita, Gurudwara-o ‘Akhand paath’ koba dakangaha aro ia Akhand paath-ko dakaniko mija September 15 tarikoni a·bachenge Prime Minister-ni atchiani salo, chong·moran September 17 tariko matchotataha.
Indake ong·engon, Sikh jatni palo seoke watako man·giparangoniara, All India Kendriya Guru Singh Sabha-ni president Tarvinder Singh Marwah, All India Kendriya Guru Singh Sabha-ni president-ni kamko jako ra·pagipa Veer Singh, aro Delhi-oni Kendriya Guru Singh Sabha-ni skotong dilgipa Naveen Singh Bhandari aro gipinrang ong·a.
