New Delhi, Nov 27: Pilot-rangni ranta ka·anio jakkalenggipa Navy-ni MIG-29K dakgrikani sildorengko Arabian sagalo chalaimiting somaio mijal Bristibar attamchibara 5 bajimango tanggitik bangbango a·sel ong·changanichi sildorengo dongpagipa saksa pilot gimaenga ine Indian Navy official-oni u·iataha.
“A·sel ong·ao donggipa saksa pilot-ko sandiate nikpilaha indiba gimaenggipa gnigipa pilot-koba bangbango aro chini kosakgiligil re·wenwene niarangchi am·sandianiko dakatenga. A·sel ong·aniko sandiatchina gita ge·etanikoba on·aha,” ine official janapataha.
Arabian sagalo a·sel ong·miting somaio sildorengo gagipa sakgni pilot-rangoni, saksa gimaenga. Iano daito gnanggipa bil man·giparangko a·sel ong·ani ja·pangko u·ina gita sandiataniko dakchina ge·etanikoba on·aha.
Mija bilsi November jaoba, Navy-ni bolsa MiG-29K dakgrikani sildoreng bangbango bilengmitingo do·o mangsa bilgakani ja·man sagal jatchio ga·aksruaha, indiba ua somaio pilot sakgnian an·tangtangko namen naljokatna cholko man·aha.
Indian Navy-o Goa aroba Indian Navy Ship (INS) Vikramaditya aircraft carrier-oni challaiatenggipa gimik-gimang bol 40 MiG-29K dakgrikani sildorengrang gnang.
