Shillong, Nov 27: November 27 Sukrobal salo Inner Line Permit (ILP)-na dabie aro Citizenship Amendment Act (CAA)-ko jegale Confederation of Meghalaya Social Organisation (CoMSO) ba·ra gisimni nisanko ra·e a·dok gimikon jegalangaha.
Ba·ra gisimni nisano ‘Chingna ILP-ko Nanga, ILP-ko Man·jaskal Dontongjawa’, ‘ ILP-ko Nanga, CAA-ko Nangja’, ‘Amit Shah aro Modi – Chingna ILP-ko Nanga’ ine see Shillong songjinmani Para gari salgiparango aro bang·bata garirangon ra·bite jegalanirangko nikangaha.
Hynniewtrep Youth Council (HYC)-ni dakchakgipa padot aro CoMSO-ni doloni Donboklang Kharlyngdoh ba·ra gisimko ra·e jegalanian ru·uta somoirangoni ILP-na dabiani chin ong·enga ine aganaha.
ILP-na dabianiko ma·mong sorkari namrenge ra·enganiko nike “ Meghalaya a·dokna ILP-kode nangchongmota maina iasan a·dokona nasrukbaenggiparangko champengsoe Tribal manderangna chel·chakaniko on·a man·gipa chol ong·aia” ine Donboklang kharlyngdoh aganaha.
Changgipino ILP-na dabianiko dingchikbate dakangkuna CoMSO damsan asonge chanchirimaniko dakchenggen ineba Kharlyngdoh agandapaha.
