Shillong, Sept 16 : Bristibar salo Shillong songjinmao tom·aniko ong·atangenba a·dokni Congress dol, sakbonga gital dilgiparangko dolona rimnapdapangaha.Dolona gital rimnapako man·giparangara – HSPDP-ni membor aro ukil Dr. Fenela Lyngdoh Nonglait, political-ni dilgiparang jekai Pa RG Lyngdoh aro KHADC-ni MDC aro CEM gitcham Pa PN Syiem, Jirang Lambok Mylliem-oni MLA gitchamni depante Adrian Lambert C Mylliem aro Pa Mosjo R Wanswet, iamang sakbongaan Britibar salo Congress dolo napetokaha.

Indake ong·oba, iamangoni Pa Lyngdoh aro Pa Syiem-maang sakgnide Congress dolona pil·bataiani gitasa ong·enga.

Tom·ao, a·dokni Congress dolni padot Pa Vincent Pala, iamang sakbongako dolona dingtangmancha rimchakangaha.